Бала Абай әлемі
«Балапан» бөбекжай-балабақшасында Абай Құнанбайұлының 175 жылдығына орай Венера Абылаева мен Әйгерім Өтепбергенованың ұйымдастыруымен «Бала Абай әлемі» атты кеш өтті. Бүлдіршіндерге қазақтың бас ақынының өмір жолы мен шығармашылығын таныстыру мақсатындағы шарада балалар оның өлеңдерін мәнерлеп оқып, Абайдың балалық шағы туралы көрініс қойды.Көңілді кешті жүргізген балабақша тәрбиеленушілері Әлихан мен Кәусар Абайдай дара, дана тұлға туған қазақ ұлтының ұрпағы екендіктерін мақтанышпен жеткізді.
Бүлдіршіндер өнерін тамашалаған ата-аналар балабақша ұжымына алғыс білдіріп: «Абаймен бар қазақ мақтанады. Оның есімі мәңгілік. Балаларға ұлы тұлғаның өлеңдерін жаттатып, олардың бойында жырға, Абайға деген құрметті арттыруға күш салып жатқан тәрбиешілерге алғысымыз шексіз», – дейді.
Жадыра МАХАМБЕТОВА
