Қазалы Қазалы аудандық қоғамдық-саяси газет
» » Қазалыда Абайдың барлық өлеңдерін жатқа білетін оқушы бар

Қазалыда Абайдың барлық өлеңдерін жатқа білетін оқушы бар

Қазалылық оқушы Аяулым Азен ақын Абай Құнанбаевтың өлеңдерін түгел жатқа біледі.

Әйтеке би кентіндегі №170 мектептің 8-сыныбына аяқ басқан Аяулым Хәкім Абайдың барлық өлеңдері мен 35 қара сөзін жатқа айтады. Ұлы ақынның өлеңдеріне құмартқан ол аудандық, облыстық «Абай оқулары» сайыстарында жүлдеге қол жеткізген.

Ал осы жылы «Өлең - сөздің патшасы, сөз - сарасы» атты облыстық Абай Құнанбаевтың өлеңін жатқа айтушылардың жарысында бірінші орын иеленді.

«Әкем Абай атаның өлеңдерін жаттасаңдар, жаман болмайсыңдар деген. Сіңлілерім де менімен жарыса өлең жаттауда», - дейді Аяулым.

Аяулымның зеректігін аңғарған ұстазы Майра Омарованың да айтары бар.

«Мен Аяулымның сынып жетекшісімін. Ол өте ұқыпты. Мәселен, Абайдың өлеңдерін бөліп-жармай, кітабының алғашқы бетінен, соңғы парағына дейін жаттаған. Сондай-ақ, Аяулым есепке де жүйрік», - дейді ұстазы.

Бұдан бөлек, Аяулым Абайдың қара сөздерін айтушылардың арасында өткен республикалық байқауда үшінші орын алған.

«Аяулым - қыздарымның тұңғышы. Әр ата-ана баласының жетістікке жеткенін, биіктерден көрінгенін қалайды. Мен де қызымның сабаққа деген ынтасын арттыру мақсатында көп қадағаладым. Әдепкіде математикаға деген құштарлығын ескеріп, осы бағыттарда жұмыс жасадық. Одан кейін, Абай атамыздың өлеңдеріне ден қойғыздым. Өз басым Абайдың қара сөзін, өлеңдерін білген жанның жаман болмайтынын білемін. Өлең-жыр кез келген жанға жігер мен шабыт сыйлайтыны анық. Бір жағынан есте сақтау қабілетінде арттырады», - дейді Аяулымның қара өлеңге қаршадайынан құмартуына себепкер болған әкесі Жеңісбек Аралбаев.

30 шілде 2018 ж. 563 0

Жаңалықтар мұрағаты

«    Қазан 2019    »
ДсСсСрБсЖмСбЖс
 123456
78910111213
14151617181920
21222324252627
28293031