UFC чемпионы Конор Макгрегор Ирландия президенттігіне үміткер болатынын мәлімдеді
Фото: instagram.com/thenotoriousmma
Бұрынғы UFC чемпионы Конор Макгрегор Ирландия президенттігіне үміткер болатынын мәлімдеді. Бұл туралы Stan.kz ақпарат агенттігі хабарлайды.
Оның айтуынша, 2026 жылғы 12 маусымға дейін Ирландия ЕО-ның Миграциялық пактісін толық орындауы тиіс. Бұл мерзімге дейін парламенттің екі палатасы бірнеше заңнамалық актілерді қабылдап, президент оларды бекітеді. Келесі президенттік сайлау 2025 жылғы 11 қарашаға дейін өтуі тиіс.
"Менен басқа кім үкіметке қарсы тұра алады? Олар ұсынатын кез келген басқа кандидат оған қарсы тұра алмайды. Бірақ мен қарсы тұрамын! Президент ретінде бұл заң жобасын референдумға шығаруға дайынмын. Мен бұл пактқа түбегейлі қарсымын, бірақ бұл менің де, үкіметтің де еркінде емес. Мен президент болған кезде бұл – Ирландияның болашағы болмақ. Барлық ирландиялықтар өз пікірін білдіріп, болашағын өздері анықтауға мүмкіндік алуы керек!" – деп жазды Макгрегор Instagram парақшасында.
Макгрегор Ирландиядағы мигранттарға қатаң қарсы көзқараста, тіпті осы мәселе бойынша жақында АҚШ президенті Дональд Трамппен кездескен еді.