Роза Бағланова атындағы мәдениет орталығында өткен шарада аудан әкімінің орынбасары Дәурен Тілеумбетов Бүкілодақтық көркемөнерпаздар байқауының жүлдегері, «Қазалының Левитаны» атанған азаматқа жылы лебізін білдіріп, аудан әкімінің құттықтауын жеткізді.

Сондай-ақ, мерейтой иесіне облыстық мәслихат депутаты Ібайдулла Тілеп, қалалық ардагерлер кеңесінің төрағасы Темірбек Исмайлов, аудандық мәдениет және тілдерді дамыту бөлімінің басшысы Болат Жолтаев және Мақсатбаевтар мен Қожағұловтар әулетінің өкілдері де ізгі тілектерін айтып, құттықтау сөз сөйледі.

Шығармашылық кеште мерейтой иесінің әні мен сөзіне жазылған әндер орындалды. Мақсатбаевтар әулетіндегі өнерге таласы бар өнерпаздар сахна төріне көтеріліп, әсем әуендерді шырқады.

Әзіл-қалжыңға біртабан жақын ағаның «Кенже-Әлі айтқан екен» деген әңгімелері ел аузында көптеп айтылуда. Шығармашылық кеште Кенже-Әлі Мақсатбайұлының бір топ ізбасарлары мен өнердегі әріптестері «Кенже-Әлі айтқан екен...» деген миниатюрасын орындағанда залда отырғандар қыран-топан күлкіге қарық болды.

Айта кетейік, Кенже-Әлі Асқар ауданның мәдениеті мен өнерін дамытуға елеулі үлес қосқан азамат. Ағаның еңбегі еш кеткен жоқ. Өзінің кербез, даланың әсем табиғатындай қоңыр даусының арқасында «Қазалының Левитаны» деген атқа ие болды.