Ардақ тұтар ел сені
Жуырда Ғ.Мұратбаев ауылдық кітапханасында кітапханашы Әйгерім Смағұлованың ұйымдастыруымен "Ардақ тұтар ел сені" тақырыбында оқырман бенефисі өткізілді. Мақсаты – оқырмандардың кітапқа деген қызығушылығын арттырып, рухани жан дүниесін ояту, ғылым мен білімнің пайдасы жайлы түсіндіріп, кітап оқуға шақыру.Тағылымды басқосуда кітапхананың үздік оқырмандары, ардагер ұстаздар: Жүсіп Қази, Қалибек Мұсаұлы, Ғ.Мұратбаев атындағы №91 мектептің еңбек пәнінің мұғалімі Төлеген Күнділдә әртүрлі тақырыпта оқырмандарға өмірдің өнегелі тұстарын үйретті. Кітапты көп оқыған адамның ішкі рухани байлығы артатындығын айтып, жас оқырмандардың сауалдарына жауап берді.
Сондай-ақ, шараға қатысқан Ғ.Мұратбаев атындағы №91 мектептің 9-10 сынып оқушылары, Ғ.Мұратбаев ауылдық округі әкімшілігінің әдіскері Айзат Махашова, жетекші маманы Ерасыл Дәстенов, аудандық орталық кітапхана қызметкерлері өз ой-пікірлерін ортаға салды.
Мазмұнды кешті аудандық балалар кітапханасының меңгерушісі Айна Айтжанова қорытындылап, шақырылған қонақтарға алғысын білдіріп, сый-сыяпат табыстады.
