Шарада аудан әкімі Мұрат Ергешбаев сөз сөйлеп, қасіретті жылдары Кеңес Одағының солақай саясатының кесірінен қазақтың бетке ұстар азаматтары жазықсыз жапа шеккенін тілге тиек етті. Тәуелсіздік жолында жаны құрбан болғандардың қатарында мемлекет және қоғам қайраткерлері Тұрар Рысқұлов, Бейімбет Майлин, Ахмет Байтұрсынов, Ілияс Жансүгіров сынды көптеген асыл азаматтарымыз бар.

– Бұл қасірет біздің өңірімізде де оңайшылықпен өткен жоқ. Қазалылықтар арасында кезінде білім бөлімін басқарған Нұржан Баубеков, Қазақстан Республикасы Жоғарғы Сотының Төрағасы Қазмұхамед Күлетов сияқты 400-ге жуық жерлестеріміз қуғын-сүргін құрбаны болды, – деген аудан әкімі жазықсыз жаланың құрбаны болған азаматтарды еске алып, оларға тағзым ету – біздің қасиетті парызымыз екенін жеткізді.

Қасірет пен зобалаң шақтарда құрбан болған азаматтарға тағзым етуге арналған шарада театрландырылған көрініс көрсетіліп, нәубетті жылдары қаза тапқандар бір минут үнсіздікпен еске алынды.