"Нұр Отан" партиясының "Тарлан тарих тағылымы" партиялық жобасы аясында аудандық партия филиалының ұйымдастыруымен аудандық орталық кітапханада 31 мамыр саяси қуғын сүргін құрбандарын еске алу күніне арналған кітап көрмесі болып өтті.

Кітап көрмесіне "Нұр Отан" партиясы аудандық филиалы төрағасының бірінші орынбасары Мәмбетжан Қасқырбек Өмірзақұлы, аудандық орталық кітапхана ұжымы мен оқырмандар қатысты. "Азалы жылдар жаңғырығы" атты көрмені аудандық орталық кітапхананың оқырмандарға қызмет көрсету бөлімінің меңгерушісі Мұстафаева Зоя таныстырып өтті. Көрмеге Н.Дулатбековтың "Алаш ардақтылары", М.Қозыбаевтың "Ақтаңдақтар ақиқаты", С.Өзбекұлының "Арыстары алаштың" және "Қазақ қалай аштыққа ұшырады" тағы да басқа көптеген саяси кітаптар қойылды. Аталған көрме аясында аудандық партия филиалы төрағасының бірінші орынбасары Қасқырбек Өмірзақұлы сөз алып, "31 мамыр – бүкіл қазақ баласы көкірегін қарс айырып, бір сәт күрсінетін күн. Өлгенге иман, өткенге салауат тілейтін күн. Қаскөй саясаттың қанқұйлы қасап-қыспағынан қапыда мерт болған қаншама қазақ баласын жоқтайтын күн. ХХ ғасырдағы саяси қуғын-сүргін – мыңдаған жазықсыз адамдардың қаны мен көз жасына суарылған тарихымыздың шерлі беттерінің бірі болып саналады. Әкімшілік-жазалаушы жүйе еңбектеген сәбиді де, еңкейген кәріні де, болмысы нәзік әйелді де аяған жоқ. Біздің ендігі жердегі борышымыз – осы қанқұйлы жылдардың оқиғасын, оның жазықсыз құрбаны болған азаматтардың есімдерін ұмытпау, оларды мәңгі есте сақтау."-деді. Саяси қуғын -сүргін құрбандарын еске алуға арналған кітап көрмесі аясында оқырмандар өз пікірлерін айтып, тағлымы мол тарихымыздың көптеген қыр-сырлары жайында мәліметтер алды.

Қазақстанда 1927 жылдан бастап 1953 жылға дейін 103 мың адам қуғындалды, 25 мың адам атылды. Аштық кезінде 42 % қазақ қаза тапты, 1 млн адам елден көшіп кетті.