Таза болашақтың бастауы
Тазалық – адамның мәдениеті мен қоршаған ортаға деген құрметінің айнасы. Ал туған жерге деген сүйіспеншілік оны сөзбен ғана емес, нақты іспен аялаудан басталады. Көшенің көркі, ауылдың ажары, елді мекеннің тазалығы – сол жерде тұратын әр азаматтың ортақ жауапкершілігінен қалыптасады.Осы орайда елімізде жүзеге асып жатқан «Таза Қазақстан» акциясының маңызы айрықша. Бұл – айналаны қоқыстан тазартумен ғана шектелмейтін, қоғамның экологиялық мәдениетін қалыптастыруға бағытталған игі бастама. Акция аясында елді мекендерді абаттандыру, қоғамдық орындарды ретке келтіру, көгалдандыру, тазалық жұмыстарын жүргізу арқылы қоршаған ортаға жанашырлық танытуға жол ашылуда.
Тазалық – бір күндік науқан емес. Ол адамның күнделікті әдетіне, өмір салтына айналғанда ғана нәтижесі көрінеді. Сондықтан табиғатты қорғау мен туған жерді көркейту ісіне әр азаматтың өзіндік үлес қосуы маңызды.
Бұл бағытта Қожабақы ауылындағы №25 орта мектептің ұжымы да белсенділік танытып келеді. Мектеп ұжымы «Таза Қазақстан» акциясы аясындағы тазалық және абаттандыру жұмыстарына атсалысып, ауылдың көркеюіне өз үлестерін қосуда. Аула мен қоғамдық орындарды тазалау, айналаны ретке келтіру, көгалдандыру секілді жұмыстардың барлығы туған жерге деген жанашырлықтың нақты көрінісі.
Мұндай шаралардың тәрбиелік мәні де зор. Әсіресе жас ұрпақтың бойына тазалықты сақтау, табиғатты аялау, қоғамдық ортаға жауапкершілікпен қарау секілді қасиеттерді қалыптастыруда мектеп ұжымының атқарар міндеті үлкен. Бала үлкендердің ісінен үлгі алады. Сондықтан ұстаздың тазалыққа, табиғатқа деген құрметі оқушыға да әсер етпей қоймайды.
Шын мәнінде, қоршаған ортаны қорғау – тек табиғатты сақтап қалудың жолы емес, ел болашағына деген жауапкершіліктің де белгісі. Таза аула, жинақы мектеп аумағы, көрікті көше, жайқалған жасыл желек – ауылдың ажарын ашып қана қоймай, тұрғындардың өмір сүру ортасына деген көзқарасын да өзгертеді.
«Бір тал ексең – бір ғұмырлық сауап» деген тағылымды сөз бар. Бүгін отырғызылған бір тал, тазартылған бір көше, ретке келтірілген бір аула – ертеңгі ұрпаққа қалатын игіліктің бастауы. Табиғатқа жасалған әрбір қамқорлықтың өз қайтарымы бар. Ол – таза ауа, көрікті орта, жайлы мекен және табиғатты қадірлей білетін саналы ұрпақ.
«Таза Қазақстан» акциясының түпкі мәні де осында. Бұл – белгілі бір мерзімде өткізілетін шарадан гөрі, елдің әр азаматын ортақ іске жұмылдыратын, тазалық пен тәртіпті қоғамдық құндылыққа айналдыруды көздейтін бастама.
Туған жердің тазалығы – өз қолымызда. Сондықтан қоршаған ортаны аялау, табиғатты қорғау, көшелер мен қоғамдық орындарды таза ұстау әрқайсымыздың күнделікті міндетімізге айналуы қажет. Өйткені бүгінгі ұқыптылық – ертеңгі ұрпаққа жасалған қамқорлық.
Тазалық – тәртіптен, тәртіп – жауапкершіліктен басталады. Ал таза Қазақстан – әр азаматтың туған жерге деген сүйіспеншілігі мен ортақ еңбегінің жемісі.
Нұрсұлу СЕЙТОВА,
№25 орта мектеп директорының тәрбие жұмысы жөніндегі орынбасары
