Бүгін «Ауыл аманаты» жобасына сәйкес аудан әкімдігінің мәжіліс залында «Кезекті қаржы жылында кредит беру үшін ауылдық округтерді іріктеу және олардың скринингі» тақырыбында онлайн оқу курсы өтті. «AMANAT» партиясының хатшысы Эльдар Жұмағазиев төрағалық еткен онлайн оқытуға аудандық партия филиалының төрағасы Ғазиз Әліш, Атқарушы хатшы Нұрғиса Жалғасбаев, тиісті дербес бөлім басшылары мен кент, қала және барлық ауылдық округтердің әкімдері қатысты.

Мұнан соң партия филиалының төрағасы Ғазиз Әліштің төрағалығымен партия атынан сайланған әкімдермен алда атқарылатын жұмыс барысы пысықталды.

«Бүгінде партия атынан сайланған әкімдердің белгіленген міндеттемелерді тиімді орындауы азаматтардың сенімін сақтауға мүмкіндік береді. Сол себепті «AMANAT» партиясы әр өңірдегі және жергілікті жердегі жүйелі жұмысқа назар аударып, ауыл әкімдерімен жұмыс тиімділігін арттыруды көздеп отыр. Сіздер ауылдық деңгейдегі партияның өкілі ретінде партия құндылықтарын жеткізуші жауапты азаматсыздар. Сондықтан ауыл тұрғындарын қолдауға және өмір сүру сапасын арттыруға бағытталған партия бастамаларын партиялық жауапкершілікті сезіне отырып белсенді іске асыруға атсалысып, сайлауалды бағдарламаларыңыздың әр тармағының орындалуына жұмыс жасауларыңыз қажет», - деді Ғазиз Әлмәмбетұлы.

Сондай-ақ жиында партия филиалының Атқарушы хатшысы бірлесе атқаратын жұмыстар төңірегінде хабарлама жасап, партиялық жобалар бойынша нақты ақпарат берді.

Жиын барысында «Ауыл аманаты» жобасын ауданымызда тиімді жүзеге асыру бойынша қатысушылар пікір алмасып, тиісті ұсыныстар берілді.