Қазақстанда азық-түлік тауарларын сату көлемі өсті
Өсім сауда кәсіпорындарында да, жеке кәсіпкерлік сегментінде де байқалды.
Фото: ЖИ2026 жылғы қаңтар-қыркүйекте Қазақстандағы бөлшек сауда көлемі 20 048,8 млрд теңгені құрап, 2025 жылдың сәйкес кезеңімен салыстырғанда 4,5%-ға өсті, деп хабарлайды inbusiness.kz сайты.
Ұлттық статистика бюросының баспасөз қызметінің мәліметінше, өсім сауда кәсіпорындарында да, жеке кәсіпкерлік сегментінде де байқалды.
Сауда кәсіпорындарының тауар өткізу көлемі 2,1%-ға, ал базарларда сауда жасайтындарды қоса алғанда, жеке кәсіпкерлердің тауар өткізу көлемі 9,3%-ға артты.
–Бөлшек сауданың тауарлық құрылымында азық-түлік тауарларын өткізу қарқыны жоғары болды. Азық-түлік тауарларын өткізу көлемі 10,1%-ға, азық-түлікке жатпайтын тауарларды өткізу көлемі 1,6%-ға өсті, – деген дерек келтірді ведомство.
Өңірлер бөлінісінде бөлшек сауданың өңірлік құрылымында ең жоғары үлес:
Алматы қаласына тиесілі, жалпы сауда көлеміндегі үлесі 32,8%
Одан кейін Астана қаласы (14,2%),
Қарағанды облысы (7%)
Шығыс Қазақстан облысы (5,3%) орналасқан.
2026 жылғы қаңтар-қыркүйекте көтерме сауда көлемі 40 707,2 млрд теңгені құрап, 2025 жылдың сәйкес кезеңімен салыстырғанда 7%-ға өсті. Көтерме сауда тауар айналымының құрылымында азық-түлікке жатпайтын тауарлар мен өндірістік-техникалық мақсаттағы өнімдер басым. Олардың үлесі 80% шамасында болды.
Көтерме сауданың жалпы көлемінде ең жоғары үлес Алматы қаласына тиесілі (35,1%). Одан кейін Астана қаласы (14,5%), Атырау облысы (13,5%) және Шымкент қаласы (6,3%) орналасқан.
