Жалпыхалықтық сенбілік ұйымдастырылды

Ұлыстың ұлы күні – Наурыз мерекесі қарсаңында Қазалыда жалпыхалықтық сенбіліктер ұйымдастырылды.

"Birge. Taza Qazaqstan" акциясы аясында өткізілген сенбілікке Әйтеке би кенті, Қазалы қаласы және ауылдық округ тұрғындары белсене қатысты.

Қолдарына қажетті құрал-саймандарын ұстаған аудан әкімі аппараты, аудандық мәслихат, дербес бөлім және мекеме-кәсіпорын ұжымдары аудан орталығы – Әйтеке би кентінің шет аймақтарын күл-қоқыстан тазартып, әр жерде бей-берекетсіз шашылған пакеттерді арнайы орынға шығарды.

Аудан әкімі Мұхтар Оразбаев жалпыхалықтық сенбілікке шыққан тұрғындармен кездесіп, берекелі бастамаға өз үлесін қосқандарға алғысын айтты.

Сонымен қатар, Мұхтар Әуесұлы осы қасиетті мекеннің ауасын жұтып жүрген әрбір қазалылық туған жерді таза ұстап, өзіміз тұрып жатқан жерді ластамауға шақырды.