«7-20-25» бағдарламасы келер жылы жалғасын табады
«7-20-25» бағдарламасы келер жылы да жұмыс істеуі мүмкін, ал Отбасы Банктің ипотекалық портфелі бәсекелестік ортаға, яғни нарықтық реттеуге беріледі деген жоспар бар, деп хабарлайды Azattyq Ruhy агенттігі «Хабар 24» телеарнасына сілтеме жасап.«7-20-25» ендігі жылы да жұмыс істейтін болады. Ұлттық банк Krisha.kz-ке осындай болжамын айтты.
«Қазіргі қарқынмен мақсатты қаражатты 2023 жыл ішінде игеруге болады деп болжап отырмыз», - делінген ресми жауапта.
Жалпы «7-20-25» бағдарламасына бөлінген қаржының игерілуі пәтерлерге төлем қабілетті бар адамдардың сұранысына және бағдарлама бойынша іске асырылатын жаңа тұрғын үйлердің көлеміне байланысты. Бағдарламаның нақты қашан аяқталатыны белгісіз. Бірақ несиелендіру 1 трлн теңге толық игерілгенге дейін жалғасады.
Ипотекалық портфель иесі кім болады?
Отбасы Банк ипотекалық портфелін бәсекелестік ортаға беруді жоспарлап отыр. Қаржы нарықтарындағы бәсекелестікті дамыту жөніндегі жол картасында осылай жазылған деп хабарлайды LS сараптама агенттігі.
«Екінші деңгейдегі банктердің тұрғын үйді несиелендіру бағдарламаларына тең қолжетімділігін қамтамасыз ету керек немесе халықтың әлеуметтік осал топтарына несие беру құзіретін қалдырып, Отбасы банктің ипотекалық портфелін бәсекелестік ортаға беру керек» делінген құжатта.
Бұл ұсыныс ашық нормативтік құқықтық актілер алаңында талқыланады. Ал FINANCE kz сарапшылары «ипотекалық портфельді басқа банктерге беру және оларды тұрғын үй жинақ бағдарламасына жіберу нарықты бәсекеге қабілетті етуге, қызметтердің сапасын арттыруға мүмкіндік береді дейді.
