Жедел басқару жүйесінде жай қалай?
Облыстың барлық ауданында полиция бөлімдерінің Жедел басқару орталықтары іске қосылған болатын. Кез келген қылмыстың ізін суытпай ашуға септігін тигізетін бұл жоба Ішкі істер министрлігінің бастамасымен және аймақ басшысының қолдауымен жүзеге асуда. Аудандағы Жедел басқару орталығының қазіргі жайын аудан әкімі барып көрді.Жақында аудан әкімі Алмасбек Есмаханов Әйтеке би кентіндегі аудандық білім бөлімі мен полиция бөлімі және Қазалы аудандық көп бейінді ауруханасына қарасты «Болат Жолы» дәрігерлік амбулаториясына барып, мекемелердің жұмысымен танысты. Алдымен аудан басшысы аудандық білім бөліміне барып, бөлімнің жұмысы мен ғимараттың жай-күйін көрді. Аралау барысында мекеме ауласының санитарлық тазалығына қатысты бөлім басшысына бірқатар тапсырма жүктеді.
Одан соң аудан басшысы аудандық полиция бөлімі мен ондағы Жедел басқару орталығының жұмысын көрді. Өткен жылы Үкімет басшысының тапсырмасына сәйкес аймақ басшысы Нұрлыбек Машбекұлының қолдауымен қоғамдық қауіпсіздікті сақтау мақсатында аудандық полиция бөлімінде кіші жедел басқару орталығы ашылған еді. Облыстық бюджеттен қаржы бөлініп, ауданда қоғамдық орындарда тәртіпті бақылайтын 79 бейнекамера, жол қозғалысы ережелерін бұзғандарды автоматты түрде анықтайтын 7 стационарлық жылдамдық өлшегіш құрылғысы орнатылды. Жедел басқару орталығы арқылы аталған камералардың көмегімен жыл басынан бері ауданда 5 қылмыс ашылса, 3314 әкімшілік құқық бұзушылықтар анықталған.
Жедел басқару орталығы құқық бұзушылықтардың алдын алудан бөлек оқыс жағдайға ұшыраған азаматтарға дер кезінде көмек көрсетуге септігін тигізіп, жол-көлік оқиғаларының санын азайтуға мүмкіндік береді. Алмасбек Әбілқасымұлы құқықбұзушылықтарды анықтау бағытындағы мұндай жұмыстарды әлде де күшейтіп, алдағы уақытта камералар санын көбейтуге жұмыс жасау керегін айтты. Одан соң аудан әкімі Қазалы аудандық көпбейінді ауруханасына қарасты «Болат Жолы» дәрігерлік амбулаториясына барып, ондағы жүргізіліп жатқан күрделі жөндеу жұмыстарын көрді. Аудандық аурухананың басшысына жөндеу жұмыстарының сапасын ұдайы бақылауда ұстап, уақыты аяқтауды тапсырды. Амбулаторияның жөндеу жұмыстарымен «Гор Сервис Проект» ЖШС айналысуда.
А.ӘЛИ
