Фракция отырысында сайлауалды бағдарламаның орындалу барысы талқыланды
Фото: Ернұр КамаБүгін Қазалы аудандық мәслихатындағы «AMANAT» партиясы депутаттық фракциясының кезекті отырысы өтті. Жиында партияның сайлауалды бағдарламасының аудан көлемінде 2025 жылға жүзеге асырылу барысы жан-жақты қаралды.
Отырысқа жетекшілік еткен Нұрғиса Жалғасбаев биылғы жылы жоспарланған іс-шаралардың толық әрі сапалы орындалуы үшін мемлекеттік органдар мен депутаттық корпус өкілдерінің белсенділігі айрықша маңызды екенін атап өтті.
Күн тәртібіндегі негізгі мәселе бойынша аудандық экономика және қаржы бөлімінің басшысы Бақытжан Жарылқап баяндама жасады. Оның айтуынша, есепті кезеңде бағдарламаны жүзеге асыру шеңберінде 76 іс-шара жоспарланып, жыл басынан бері оның 7-і орындалған. Сонымен қатар бөлім басшысы орындалуында қиындықтар туындауы мүмкін бірқатар тармақтарға тоқталып, оларды шешу жолдары бойынша ұсыныстарын білдірді.
Жиынға арнайы қатысқан партия филиалының төрағасы, аудандық мәслихаттың төрағасы Ғазиз Әліш орындалмау қаупі бар әрбір іс-шараны жеке-жеке саралап, олардың негізгі себептерін атап өтті. Басым бөлігінің негізгі себебі қаржыландыру мәселесі. Бұл бағытта облыстық партия филиалына тиісті ұсыныстар жолданатынын жеткізді.
Фракция отырысының қорытындысында сайлауалды бағдарлама міндеттерін толыққанды орындау үшін барлық мүдделі тараптардың өзара үйлесімді жұмыс жүргізуі қажет екені баса айтылды.
#AMANAT
