Халықтың еркіндігін бейнелейді
Құрметті қазалылықтар, сіздерді келе жатқан Республика күнімен құттықтаймыз! Қазақстанның Тәуелсіздікке қол жеткізгеніне 30 жылдан астам уақыт өтті. Әрбір қазақстандық үшін бұл маңызды оқиға ұлттың бірлігін, мемлекеттің дамуын және халықтың еркіндігін бейнелейді. Бұл мерекеде еліміздің әрбір азаматы бір-бірін құттықтап, мемлекетіміздің гүлденуін тілеу – үлкен қуаныш.25 қазан күні тойланатын Республика күні еліміздің егемендік жолындағы қадамдарын еске салып, халқымыздың болашағына үлкен сенім мен үміт береді.
Біздің ел үшін 25 қазан – тарихтағы ең маңызды күндердің бірі. Дәл осы күні 1990 жылы біздің қасиетті тәуелсіздігімізге жол ашқан Қазақ КСР-нің Мемлекеттік Егемендігі туралы Декларация қабылданды.
Республика күні – халықтың рухын көтеруге, мемлекеттілікті нығайтуға, бірлігіміз бен ынтымақтастығымызды нығайтуға арналған жарқын мереке.
Біз әділ Қазақстанды құруға кірістік. Бұл жоғары мақсатқа барлық қазақстандықтардың белсенді қатысуымен ғана қол жеткізуге болады. Өйткені мемлекеттің басты тірегі және ең үлкен байлығы – азаматтар!
Осы салтанатты күні зор денсаулық, бақыт, бейбітшілік пен амандық тілейміз. Қазақстанды тұрақты дамыту және жетілдіру жолындағы еңбектеріңіз барлық бастамаларда табысты болсын.
Ардақты Отанның дамуына әрбіріміз өз үлесімізді қосайық. Елдігімізді, тілімізді және мәдениетімізді ұлықтай отырып, болашақ ұрпаққа жарқын мемлекет қалдырайық. Республика күні құтты болсын!
Өмірзақ ТҮКТІБАЙ,
Қазалы ауданының Құрметті азаматы
