Ұстаз-ғалым – туған жерде
Қазақ қыздар мемлекеттік университетінің қауымдастырылған профессоры, педагогика ғылымдарының кандидаты, ЖОО-ның үздік оқытушысы Сараш Қоңырбаева сүйікті алтын ұясы №25 орта мектебінде болды. Туған жер түлегі білім шаңырағын аралап, оқушылардың шығармашылығынан дайындалған көрмені тамашалады. 9-11 сынып оқушыларымен жүздесіп, тәрбие мен білім беру мәселелері жайлы пікірлесті. Оқушылар профессор-педагогқа көкейлеріндегі сұрақтарын қойып, тұшымды жауаптар алды. Шара соңы жас мамандармен өткізілген шеберлік сабағына жалғасты.Сол күні ауылдық мәдениет үйінде “Құндылықтан бере алған мол тағылым, Қауышты ауылымен ұстаз-ғалым” тақырыбындағы кеш өткізілді. Басқосуды бастауыш сынып мұғалімі Самал Сәрсен жүргізді. Кеш барысында ұстаз-ғалым қоғамдық жаңғырудың мән-маңызы, ұлттық тәрбиені дамыту жолдары туралы толғамды пікірлерін ортаға салды. Сараш Сахиқызы шығармашылығынан “Елімнің жүрегі – Астана” әнін Камила Қожахмет, “Жантанушылар әнұранын” мектептің 6-7 сынып оқушыларынан құралған хор ұжымы орындады. Мектептің жас ақыны Тоқтарбек Аманкелді арнау өлеңін домбырамен орындады.
Кеште Сараштың алғашқы ұстазы Ырысты Жүсіпова, Аранды ауылдық округі әкімі аппаратының маманы Жарылқасын Қуаңбаев, №25 мектеп директоры Тайберген Әбжәлел ыстық ықыласын білдіріп, қызметіне жоғары табыс тіледі.
Нұрсұлу СЕЙІТОВА,
№25 мектеп директорының орынбасары
