Жомарттықтың жарқын көрінісі

Қазақ халқында «кеусен», «көгентүп» деген ұғымдар бар. Бұл әдетте егін пісіп, мол өнім алынғанда егіншілер туған-туысқандары мен ауылдастарына астық берсе, малшылар малынан мырзалық танытатын, өзінен артылғаннын бөліп беретін дәстүр. Адамгершілік пен бірлікке үндейтін мұндай бастама біздің ауданымызда да жаңаша сипатпен көрініс табуда. «Алтын дән – 2018» мерекесі аясында кент орталығындағы Қазақстан Республикасының Тәуелсіздігіне 25 жыл монументі алаңында аудан кәсіпкерлерінің қолдауымен қайырымдылық іс-шарасын жүзеге асырылды.

Аудандық жұмыспен қамту, әлеуметтік бағдарламалар және азаматтық хал актілерін тіркеу бөлімінің басшысы Совет Бабанаевтың айтуынша, Әйтеке би кентінде тұратын жүзге жуық денсаулығында кінарат бар мүгедек жан мен 7 пробацияда есепте тұрған азамат аталмыш шараға арнайы шақырылған. Сондай-ақ бұл күнгі жайылған мол дастарқан дәмінен әлеуметтік аз қамтамасыз етілген 52 отбасы мүшесі де ауыз тиіп, жанаршылыққа бөленді.

Жиылғандар жомарттықтың жарқын үлгісін танытып, ел алғысын алып отырған азаматтардың жұмыстарына жеміс тілеп, ақ батасын берді.