Көмек қолын созды

Қазалы аудандық пробация қызметі мен аудандық жұмыспен қамту әлеуметтік бағдарламалар және азаматтық хал актілерін тіркеу бөлімі пробация қызметі есебіндегі сотталған азаматтарға көмек қолын созды. Әлеуметтік оңалтудың 2017-2019 жылдарға арналған кешенді стратегиясы аясында 1 желтоқсан Қазақстан Республикасының тұңғыш Президенті күніне сый ретінде азық табысталды. «Сыр-Маржаны» жауапкершілігі шектеулі серіктестігінің демеушілігімен әрқайсысына 10 келілік күріш үлестірілді.
Пробация қызметі есебінде тұрғандар жомарт жүректі жандардың қайырымдылығына алғыстарын білдіріп, елдің тыныштығы мен бірлігін тіледі. Қазалы аудандық пробация қызметінің бастығы, әділет майоры Ербол Сражатов оларды айтулы мейраммен құттықтап, ақжарқын лебізін жеткізді.
Сонымен қатар, қайырымдылық көмек ретінде Қазалы аудандық оқушылар үйі ұжымы атынан А.С есімді сотталғанға екі тонна қатты отын берілді.