Елбасы Н.Назарбаевтың жыл сайынғы дәстүрлі Жолдауларында ел ішіндегі аз қамтылған отбасылар мен мүгедек жандарға жан-жақты қолдау білдіру керектігін айтып келеді. Осы мәселе төңірегінде біздің ауданымызда да әртүрлі жұмыстар атқарылып жатқанын айта кеткен жөн.

Мысалы, 2018 жылға облыс­тық жұмыспен қамтуды үйлестіру және әлеуметтік бағдарламалар басқармасы арқылы Көкшетау қаласындағы «Алмаз», «Тәуелсіздік» және «Зеленый бор» шипажайларына емделуге 80 мүгедек жанға тегін жолдама бөлінген. Бекітілген кестеге сәйкес мамыр айынан бастап аталмыш жандар шипажайларға жіберілуде.

Кезекті жолдамаға ие болған 20 мүмкіндігі шектеулі жан тамыз айының 13-22 ара­лығында «Зеленый бор» шипажайында қажетті ем-домдарын алып, тынығатын болады.

Тағы бір айта кетерлігі, жуырда Қазалы ауданының жұмыспен қамту, әлеуметтік бағдарламалар және азаматтық хал актілерін тіркеу бөлімінің басшысы Т.Бөріқұлақов «Зеленый бор» санаторий-курорттық шипажайына емделуге баратын мүмкіндігі шектеулі 20 адамға бөлімнің «Газель» авто­көлігімен Қызылорда қаласына тегін жетуін ұйымдастырып, сәтті сапар тіледі.

Кездесу барысында Талайлы Әмитжанұлы тағдыр тау­қыметін тартып жүрген жандарға алдағы уақытта да көптеген қолдаулардың жасалатынын айтты.

Жалпы, елімізде мүгедек­терді әлеуметтік қорғау сала­сындағы мемлекеттік сая­сат оларды қоғамға тарту үшін тең мүмкіндіктермен қамтамасыз етуге, оңалтуға бағытталған.

Осы орайда, Қазалы ау­данының жұмыспен қамту, әлеу­меттік бағдарламалар және азаматтық хал актілерін тіркеу бөлімі мақсатты бағдар­ламаларды жүзеге асырып келеді. Мүгедек жандарға көр­сетілетін мұндай қамқорлық жыл сайын жалғасын таба бермек.