Электромобильдер үшін тегін тұрақ орындары пайда болады
Экология, геология және табиғи ресурстар вице-министрі Серікәли Мұқатаев электромобильдерге көшуді ынталандыру бойынша жол картасында көрсетілген шаралар жайында айтты, деп хабарлайды Egemen.kz.Вице-министр электромобильдерге көшуді ынталандыру жөніндегі жол картасында келесі іс-шаралар көзделгенін нақтылады:
- Газ-моторлы отынмен және электр қозғалтқыштарымен жұмыс істейтін қалалық қоғамдық көліктің үздіксіз жұмыс істеуі үшін қажетті инфрақұрылыммен қамтамасыз етілуіне қарай дизель отынымен жұмыс істейтін автокөлік құралдарын сатып алуды кезең-кезеңмен шектеу (жауапты орындаушылар - Алматы және Астана қалаларының әкімдіктері);
- Электромобильдер үшін инфрақұрылымды дамыту және ынталандыру іс-шаралары (жауапты орындаушы - Алматы және Астана қалаларының әкімдіктері);
- «Электромобильдер тұрағы» арнайы белгісін әзірлеу және электромобильдер үшін тротуар үлгісіндегі ақылы автотұрақтарда тегін тұрақ орындарын бөлу (жауапты орындаушылар - Алматы және Астана қалаларының әкімдіктері).
