Есімі ел есінде

«Әркімнің туған жері – өзіне жұмақ». Тұран ойпатын жайлаған Қазалы топырағынан әнші де, биші де, суретші де, ел билеген басшы да, сонымен қатар қаламгерлер де дүниеге келген. Тумысынан зерек те, дарынды, білімге құштар, қиялы ұшқыр, арманшыл ұрпақтың өкілдері де осында ел сыйлар тұлға болып қалыптасты. Солардың қатарында белгілі ақындар Сейіл Боранбаев, Әнес Нарымбетов, Мешітбай Құттықовтармен қатар республикалық басылымдардың журналисі, ақын Нұрперзент Домбай, белгілі журналист Сексенбай Күлімбетов, аудандық баспасөзде жауапты қызметтер атқарған ақын, белгілі журналист, «Қазалы вальсі» өлеңінің авторы Жетіскен Мәкеналы да ел жадында жаңғырып тұр. Әттең есімі республикаға жайылған ақынның биыл мерейлі 70 жасты ел-жұрт болып тойлау бақыты бұйырмапты. Ол 2016 жылдың жазында 64 жасында кенеттен жүрегі тоқтап қалды.

Жетіскен Мәкеналы 1952 жылы Қызылорда облысы Қазалы ауданы Аранды ауылдық Кеңесіне қарасты «Қожабақы» ауылында дүниеге келген. Ақынның өлең-жырға құмарлығы мектеп қабырғасында басталады. Алғаш рет сүйікті ұстазы, ақын Ф.Омаровқа еліктеп өлең жазуға әуестенеді. Алғашқы өлеңдері аудандық «Ленин туы» және республикалық «Қазақстан пионері» газеттерінде жарияланады.

1971 жылы Қызылорда медицина училищесін ойдағыдай бітіріп, бірінші санатты фельдшер дәрежесімен денсаулық саласында он екі жыл қызмет атқарды. Дәрігерліктің қыр-сырына қаныққаны соншалық бар жауапкершілікті бір өзі өткерген. Қаншама науқасқа жедел медициналық көмек берген. Дегенмен жаны шығармашылықты қалаған ол 80-інші жылдары Қазақ мемлекеттік ұлттық университетінің журналистика факультетін бітіріп шығады.

Шығармашылық еңбек жолын 1983 жылы 5 мамырда Қазалы аудандық «Ленин туы» газетінің бөлім меңгеруші қызметінен бастаған. Қазалы аудандық мәдениет бөлімінің меңгерушісі, аудандық тіл басқармасының бас маманы, аудан әкімі аппараты ішкі саясат секторының бас маманы, Ғани Мұратбаевтың тарихи-мемориалдық музейінің аға ғылыми қызметкері, Қазалы аудандық мәдениет бөлімінің меңгерушісі, аудандық мәдениет және тілдерді дамыту бөлімінің меңгерушісі, Ғани Мұратбаевтың тарихи-мемориалдық музейінің директоры, аудандық «Қазалы» газеті МКК директоры-бас редакторы міндетін атқарушы, Бас редакторының орынбасары қызметтерін абыроймен атқарған.

Қазақстан Журналистер одағының, КСРО Журналистер одағының мүшесі.

Ж.Мәкеналы ұзақ жылдар бойы өлке тарихын зерттеумен айналысқан. «Ортаймаған қазаны, қасиетті Қазалы», «Тамыры терең, тарихы кенен – Қазалы», «Асандар көтерілісі», Ғани Мұратбаевтың өмірі мен қызметі, жастарға рухани тәрбиесі туралы «Мен – Ғанимын», «Ғани тағылымы» атты кітаптары мен «ХХІ ғасырға аманат» атты жыр жинағы жарық көрген.

Қазақстан Журналистер одағының, Қазақстан Республикасы Мәдениет министрлігінің, Қызылорда облыстық партия комитетінің «Құрмет грамоталарымен», Қазақстан Респуб­ликасы Мәдениет және ақпарат министрлігінің «Мәдениет қайраткері» белгісімен, Қазалы ауданы әкімінің «Алғыс хатымен», «Қызылорда облысына 70 жыл» және «Қызылорда қаласына 190 жыл» мерекелік медальдарымен марапатталған.