«Халық санағы БҰҰ жариялаған халық және тұрғын үй қоры санақтарын өткізу бойынша 2020 жылғы кезекті Дүниежүзілік раунды шеңберінде жүргізіледі. Қазақстанда Ұлттық халық санағын өткізу 2020 жылғы 1-30 қазан аралығында жоспарланған болатын. Алайда елдегі COVID-19 пандемиясына байланысты 2021 жылдың күзіне ауыстырылды. Осыған байланысты Мемлекет басшысы Реформалар жөніндегі Жоғары Кеңестің отырысында 2021 жылғы 1 қыркүйектен бастап 30 қазанға дейін ұлттық санақ жүргізуді тапсырды. Үкімет қаулысына сәйкес Қазақстанда үшінші кезекті ұлттық халық санағын 2021 жылғы 1 қыркүйек пен 30 қазан аралығында өткізу жоспарланған. Оның ішінде 1 қыркүйектен 15 қазанға дейін санақ онлайн жүргізіледі. Ал 2021 жылғы 1 қазан мен 30 қазан аралығында планшеттерде жаппай сауал салу жүргізу туралы шешім қабылданды», - деді Нұрболат Айдапкелов ОКҚ алаңындағы баспасөз мәслихатында. Оның айтуынша алдағы санақтың құндылығы - Қазақстан Республикасының халқының тек саны бойынша нақты ахуалды ғана емес, сонымен қатар елдің әкімшілік-аумақтық бөлінісі бойынша ел тұрғындарын сипаттайтын демографиялық және әлеуметтік-экономикалық ақпараттың кең ауқымын алу. Сонымен қатар, деректерді демографиялық, экономикалық болжау, жұмыспен қамту саласындағы саясатты айқындау, басқа да әлеуметтік бағдарламаларды құру үшін, сондай-ақ ғылымды, бизнесті және бүкіл қоғамды ақпараттық қамтамасыз ету үшін пайдалану болып отыр. Одан бөлек басқа елдердің, бірінші кезекте, ЕАЭО бойынша әріптес елдердің санақ деректерімен салыстырмалы деректерді алу жоспарланған.