Көктемгі тазалық – көптің ісі
Күн көзі жылынғаннан қазалылықтар көркейту-көгалдандыру жұмыстарына белсене араласады. Қоршаған ортаның тазалығына немқұрайлы қарамай оған біркісідей атсалысу үрдіске айналған.Өткен сенбіде де аталмыш сенбілік жұмыстары өз жалғасын тапты. Әйтеке би кентіндегі бірнеше мекеме, кәсіпорын ұжымы аудан орталығын күл-қоқыстан тазалауға белсене қатысты.
Сенбілік барысында 500-ге жуық адам кенттің 5 квартал аймағындағы қорымдардың айналасында бей-берекетсіз шашылған қоқыстарды жинастырып, көшелер мен жолдарды тазалады. Туған жердің таза болуына үлес қосқан жандарға 3 техника көмекке келіп, жиналған қоқыстар арнайы орынға шығарылды.
Дәл осындай бірлескен қарекет Қазалы қаласы мен ауылдық округтерде де ұйымдастырылып, тазалық жұмыстары жүргізілді. Бұл жұмыстар алдағы уақытта да өз жалғасын табатын болады.
Айта кетейік, бұл сенбілік 7 наурыз бен 9 мамыр аралығындағы санитарлық тазалық айлығы аясында ұйымдастырылып отыр.
«ҚАЗАЛЫ» ақпарат
