Мереке мезіреті
Қазалылық кәсіпкер «Орын-Ай» жауапкершілігі шектеулі серіктестігінің директоры Манат Рысбаева 1 маусым – Халықаралық балаларды қорғау күні қарсаңында балғындарды қуаныш құшағына бөледі. Ол кент орталығындағы «Рау-Илья» мейрамханасында мүмкіндігі шектеулі балаларға арнап, арнайы мерекелік дастарқан жайды. Шарада аудандық жұмыспен қамту, әлеуметтік бағдарламалар және азаматтық хал актілерін тіркеу бөлімі басшысының орынбасары Баян Төлегенова мереке иелерін құттықтап, дендеріне саулық тіледі.
Ата-аналар атынан сөз алған Райкүл Оңдабаева мен Эльмира Ақниязова, үйден әлеуметтік қызмет көрсету бөлімшесінің меңгерушісі Зәмзагүл Сәдуақасова кәсіпкер Манат Рысбаеваға және әлеуметтік қызметкерлерге алғыс айтты.
Мерекелік кеште өнерлі балалар Айдана Ілияс «Балбұлақ», Досбол Шамсиқамар «Маленькая страна», Ақерке Әбілтай «Ана туралы жыр», Нұрайым Арсен «Тыңда», Нұрай Сағидулла «Ана» әндерін орындаса, биші қыздар Сырсұлу Шаңғытбай, ағайынды Мөлдір мен Гүлсара Сасан үнді биін биледі. Балаларға балмұздақ таратылып, тәттілер үлестірілді.
Үнемі ізгі істің басы-қасында жүретін, қайырымдылық шараларына белсене араласатын кәсіпкерге көпшілік ризашылығын білдіріп, кәсібінен береке табуына тілектестік білдірді.
Ұлболсын ЕРБОЛҚЫЗЫ
