Ұлттың алтын діңгегі

Аудандық әйелдер кеңесінің төрайымы Роза Асанованың бастамасымен жүзеге асырылып жатқан «Қазақ әйелі – ұлт тірегі» аудандық жобасы аясында ұйымдастырылған шараның маңызы ерекше. «Руханият» орталығында өткен кештің шымылдығын ашқан Роза Шорақызы қазақ әйелінің қоғамдағы орны, аналардың өнегелі өмір жолы мен ұлт тәрбиесіндегі рөлі жайында тебірене сөз қозғады.

Игі шараға Шәкен ауылдық әйелдер кеңесінің төрайымы Шәки Ермаханова ұйытқы болды. Кештің ең салтанатты сәті – құрметті аналармен сырлы сұқбат құру еді. Төрден орын алған «Алтын құрсақты» ана, Қара Молда атаның келіні Айжамал Қозбағарова, «Еңбек ардагері» Злиха Кусуакова және өмір жолын медицина саласына арнаған еңбек ардагері, көп балалы ана Анар Тлеубергенова өздерінің тағылымды тәжірибелерімен бөлісті. Өткен өмір жолдарынан естеліктер айтып, жас аналар мен келіндерге ұлттық құндылықтарды сақтау, отбасы берекесін еселеу жайында құнды кеңестерін берді. Олардың әр сөзі өмір мектебін өткен, сабырлы да салиқалы жанның даналығын танытты.

Рухани сұқбат соңы көркем өнерге ұласты. Шәкен ауылдық клубы жанынан құрылған «Ақмаңдайлым» әжелер ансамблі сахнаның көркін ашып, әсем әндер мен мың бұралған билері арқылы жиналған қауымға ерекше көңіл-күй сыйлады. Сахнадағы аналардың жанды дауыста шырқаған әндері залдағы барша әйел қауымының жүрегін елжіретті.Шара соңында аудандық әйелдер кеңесінің төрайымы Роза Асанова мен ауылдық әйелдер кеңесінің төрайымы Шәки Кенжебайқызы алғыс білдіріп, жүрекжарды тілектерін жеткізді. Кештің соңы ақ жаулықты анамыз Айжамал Қозбағарованың батасымен түйінделіп, елімізге тыныштық, отбасыларға амандық тіледі.

Иә, ана – бесікті тербеткенде ұлт болашағын тербетеді. Ол – қиындықта қамал, шаттықта шабыт. Бүгінгі кеш барша қазақ аруларының ел мен жер алдындағы еңбегін бір мәрте айшықтай түскендей болды. Анасыз, әйелсіз ұлылық та, ұлт та жоқ жоқ емес пе?!