Қазақстан өндірісіндегі ең қарқынды өсіп жатқан саланың бірі белгілі болды
Жыл сайын маусым айының екінші жексенбісінде Қазақстанда Жеңіл өнеркәсіп қызметкерлері күні аталып өтеді. Осыған орай саладағы негізгі көрсеткіштер мен даму жоспарлары жарияланды, деп жазады inbusiness.kz сайты.
Фото: damu.kz
Ал 2026 жылдың қаңтар-сәуір айларында жеңіл өнеркәсіп өндірісінің көлемі 77,1 млрд теңгеге жетіп, нақты көлем индексі 225,2%-ды құрады.
Ең жоғары өсім тоқыма өндірісінде тіркелді. Бұл сектордағы өндіріс көлемі 46 млрд теңгеге жетіп, нақты көлем индексі 296%-ды көрсетті. Сонымен қатар, киім өндірісі 25,2 млрд теңгені (НКИ – 135,8%), былғары және оған қатысты өнімдер өндірісі 5,8 млрд теңгені (НКИ – 142%) құрады.
Қазіргі уақытта жеңіл өнеркәсіп саласында 18 мыңнан астам адам еңбек етеді. Ел бойынша 1,4 мыңнан астам кәсіпорын жұмыс істейді, олардың басым бөлігі киім өндірумен айналысады.
Саланы одан әрі дамыту мақсатында Өнеркәсіп және құрылыс министрлігі 2026-2030 жылдарға арналған жеңіл өнеркәсіпті дамыту жөніндегі кешенді жоспар әзірлеуде. Құжат отандық өндірушілерді қолдау, өндірісті оқшаулау деңгейін арттыру және жаңа ынталандыру тетіктерін енгізуді көздейді.
Сондай-ақ, мемлекет салықтық жеңілдіктер беру, цифрлық бақылауды күшейту және инвесторларды тарту бағытындағы жұмыстарды жалғастыруда. Басым бағыттардың бірі ретінде мақта-тоқыма кластерін дамыту және шикізатты терең өңдеу жобаларын іске асыру қарастырылған.
Өнеркәсіпті дамыту қорының жеңілдетілген қаржыландыру бағдарламасы аясында 2023 жылдан бері жалпы құны 10,2 млрд теңгені құрайтын алты жоба қаржыландырылды.
Бұдан бөлек, 2025 жылы Индустрияландырудың бірыңғай картасы аясында жеңіл өнеркәсіп саласында 9 жоба іске қосылып, 520-дан астам жаңа жұмыс орны ашылды.
Министрліктің мәліметінше, 2026 жылдың соңына дейін салада тағы 9 инвестициялық жобаны жүзеге асыру жоспарланып отыр. Бұл өндіріс көлемін ұлғайтып, жаңа жұмыс орындарын ашуға мүмкіндік береді.
