Айару топ жарды
Жақында Щучинск қаласынан ақжолтай хабар жетті. Қазақстан Республикасының оқу-ағарту министрлігі ұйымдастыруымен өткен «Зерде» республикалық 2-7 сынып оқушылары арасында зерттеу жобалары мен шығармашылық конкурсының республикалық сынында зерделі бүлдіршініміз топ жарған.Әйтеке би кентіндегі С.Сейфуллин атындағы №165 мектептің 4 сынып оқушысы Айару Аманбайдың, жетекшісі Айнұр Медетованың айтуынша, «Әже тақырыбындағы шығармалардың құндылығы мен тәрбиелік мәні» атты тақырыптық зерттеуі алдымен аудандық жарыста бақ сынаса, жұмыс облыстық кезеңде де жақсы ұпайға ие болған. Республикалық байқауда да ең жоғарғы жұмыс саналып, көпшілік қызығушылығына ие болған.
Жұмыстың тәрбие-тағылымдық мәні зор. Тақырыпты талдай отырып, белгілі авторлар туындыларында көтерген құндылықтарды бойға сіңіріп, өзі сынды балалардың қызығушылығын кітапқа бағыттауды өзектілік деп таныпты.
Нысанаға алынған 10 шығарманың әрбірінен түйген құндылығын бала тілінде, өз танымында жеткізген.
– Бұл менің бірінші рет қатысып отырған жобам емес. Бірақ республикалық жарыста бас жүлде аламын деп ойлаған жоқпын. Ұстазым, әрі анам екеуіміз көп іздендік. Жинаған мәліметімізді ғылыми негізге бағыттадық. Нәтижесін өздеріңіз көріп отырсыздар, – деді әсерін бізбен бөлісіп.
Айару Болатқызы – үздік оқушы. Мектептің іс-шараларына белсене араласады. Көпшіл. Ізденімпаз. Жаңа дүниелерді меңгеруді үнемі мақсат тұтатынын білдік. Білімді шәкіртке біз де «бағындырар биігің көп болсын!» дедік.
Алтын ҚОСБАРМАҚОВА
Пікір 1