Жас ақындар жарысты
Қазалы ауданы бойынша білім бөлімінің ұйымдастыруымен 9 қазан күні М.Матаев атындағы №170 мектепте оқушылар арасында «Ақындар айтысы» жас импровизатор-ақындардың республикалық сайысының аудандық кезеңі өтті.Қазақ халқының ұлттық құндылығы, шешендік өнер арқылы мәдениеттің баға жетпес мұрасы ретінде айтысты жан-жақты насихаттау, ұлттық рух пен патриотизмге, өз халқына және оның дәстүрлеріне деген сезімін жетілдіру, талантты шығармашылық жастарды анықтау мақсатында өткізілген байқауға білім беру ұйымдарының оқушылары қатысты.
Сайыс қорытындысымен Б.К.Мергенбаев атындағы №226 мектеп-гимназияның 8- сынып оқушысы Тұрабай Тұрар жеңімпаз атанды. №93 орта мектептің 8- сынып оқушысы Нағашыбай Нұрай екінші, М.Матаев атындағы №170 орта мектептің 9-сынып оқушысы Рзаева Гауһар мен Ж.Жабаев атындағы №234 мектептің 8- сынып оқушысы Қаратай Аяулым үшінші орынды жеңіп алды.
Жеңімпаз атанған Б.К.Мергенбаев атындағы №226 мектеп-гимназияның 8- сынып оқушысы Тұрабай Тұрар сайыстың облыстық кезеңіне жолдама алды.
"Қазалы"ақпарат
