Жас ұстаз жеңімпаз атанды
Жуырда облыстық білім басқармасы мен облыстық білім және ғылым қызметкерлерінің кәсіподағымен бірлескен шешімге сәйкес Аймақтық дене тәрбиесі методикалық орталығының ұйымдастыруымен жалпы орта білім беру мекемелерінің дене шынықтыру пәні мұғалімдерінің арасында "Үздік жас маман-2022" облыстық байқауы өтті.ХХІ ғасыр – Білім ғасыры. Жастарды қолдау саясаты әрқашан мемлекет назарынан түскен емес. Еліміздің болашағы – бүгінгі жастардың қолында. Озық ойлы, ұшқыр қиялды, жаны жайсаң, кең жүректі білікті ұстаздардан білімді де білікті шәкірттер шығатын белгілі. Жас ұстаздардың біліктілігін, жан-жақты өз кәсібінің шебері екендігін анықтау, оларды іскерлікке, мәдениеттілікке, өз кәсібіне жауапкершілікпен қарау мақсатында ұйымдастырылған сайыста нағыз мықтылар алға шықты.
Байқауға аудандық, қалалық кезеңінен жеңімпаз болған 30 жасқа дейінгі 7 үміткер тест сынақтары, өзін-өзі таныстыру, панорамалық сабақтар шеруі, идеялар шеруі, партфолио қорғау кезеңдері бойынша бақ сынады.
Жас жүйріктер додасының қортындысына сәйкес, №276 орта мектептің пән мұғалімі Нүркен Жұбатқан қарсыластарын қапы қалдырып, бірінші орын тұғырынан табылды.
Еңсесі биік егеменді еліміздің адалдықты ту еткен алғыр ойлы, адал азамат ұл-қыздарына саналы тәрбие, сапалы білім беруде шаршамай, талмай еңбек етіп, еңбектеріңіздің жемісін көре беріңіздер.
"ҚАЗАЛЫ" ақпарат
