Үздіктер үзеңгі қағыстырды
Сейсенбі күні Сәкен Сейфуллин атындағы №165 мектептің базасында дене шынықтыру пәні мұғалімдерінің арасында «Үздік жас маман – 2022» аудандық байқауы өтті.Аудандық байқауға бірқатар спортты серік еткен мектеп мұғалімдері қатысты. Қатысушылар бірнеше тур бойынша бақ сынасты. Дәлірек айтсақ, байқау «Тест сұрақтары», «Өзін-өзі таныстыру», «Панорамалық сабақтар шеруі» мен «Идеялар шеруі» және «Портфолио» яғни мұғалімнің жеке шығармашылық жұмысы, әдістемелік жинақ, баспа материалдары портфолио қорғау сынды кезеңдерден тұрады.
Барлық қатысушылар жоғары белсенділік танытып, олардың әрқайсысының үздік маманға лайықты екенін дәлелдеді.
Нәтижесінде «Үздік жас маман – 2022» аудандық байқау бойынша І орынды №276 мектептің мұғалімі Нүркен Жұбатқан үздік жас маман атанды. Ал ІІ орынды №165 мектептің мұғалімі Мұратбек Үсентай қанжығаласа, қола жүлдені №249 мектеп-лицейдің мұғалімі Жанжос Қартбай пен №266 мектеп-лицейдің мұғалімі Шынболат Келінбай місе тұтты.
Сонымен қатар аудандық байқаудың жеңімпазы №276 мектептің дене шынықтыру пәнінің мұғалімі Нүркен Жұбатқан «Үздік жас маман – 2022» облыстық байқауына жолдама жеңіп алды.
«ҚАЗАЛЫ» ақпарат
