Серпінді сенбілік ұйымдастырылды
Кеше тазалыққа жаны құмар Қазалы ауданының тұрғындары жаппай сенбілікке шығып, киелі орындар мен шет аймақтарды тазалады.Қайрақбай Орынбасаров басшылық жасайтын Әйтеке би кенті әкімі аппаратының ұжымы аудан орталығындағы батыр әрі әулие Жанқожа Нұрмұхаммедұлының кесенесінде сенбілік жұмыстарын ұйымдастырды. Қолдарына қажетті құрал-саймандарын ұстаған азаматтар кесене айналасында шашылған жапырақтарды тазалап, арнайы орынға жинастырды.
Ұйымшылдықпен игілікті іске атсалысқан ұжымға аудан әкімі Мұхтар Оразбаев алғысын айтып, ризашылығын білдірді.
Мұнан соң қолына тырма алып, кесене аумағындағы арықтардың айналасын тазалады.
Аудан орталығындағы өзге мекеме-кәсіпорындар Әйтеке би кентінднгі "Қазақ" қорымының айналасын тазалады. Бүгінгі таңда шет аймақтың барлығын ұшқан пакеттер мен өзге қоқыстар басып қалған. Аудан тұрғындары ауласынан шыққан керексіз заттарды адам аяғы саябырлаған уақытта әкеліп тастай берген. Серпінді сенбілік барысында бей-берекетсіз шашылған қоқыстар жинастырылып, ретке келтірілді.
Бүгін дәл осындай сенбіліктер Қазалы қаласы мен барлық ауылдық округтерде де ұйымдастырылып, тазалық жұмыстары жүргізілді.
"ҚАЗАЛЫ" ақпарат
