Гуманитарлық көмек Қостанайға жетті
Қостанай облысының өрттен зардап шеккен тұрғындарына Сыр өңірінен 31 тоннадан астам гуманитарлық көмек келіп жетті.
Оның ішінде азық-түлік, құрылыс материалдары және басқа да қажетті заттар бар.
Партияның Қызылорда облыстық филиалында және 7 аудан мен Төретам кентінде бас-аяғы 9 гуманитарлық көмек қабылдау пункттері ашылып, тұрғындар әкелген көмектерді қабылдады.
Қостанай халқының басына түскен қиын күндерде Қазалылықтар да игі істен шет қалмады. Осы орайда өз үлесін қосқан облыстық мәслихат депутаттары Ибайдулла Тілеп, Мінәжадин Өтеев, аудандық мәслихат депутаттары Нұрлан Имандосов, Төребек Игіліков, Арғын Орымбаев, Талғат Әліпбаев, Райымбек Бөлебаев, «Энергомера» ЖШС-нің директоры Бекетай Мұхашов, жеке кәсіпкер Жасұлан Жұмахметовке және «ARZAN киім» сауда орталығының ұжымына шынайы алғысымызды білдіреміз.
Бүгін сырбойлықтардың аманатын арқалаған аталмыш керуен Қостанай облысына жетті. Қазір сондағы еріктілері оны өрттен зардап шеккен жергілікті тұрғындарға таратуда.
#КөмекҚостанай #AMANAT #ЖастарРухы
