Қуанышты күндегі құттықтау
Отбасы күніне орай аудан әкімі Мұрат Ергешбаев бірнеше шаңырақты мерекемен құттықтады.– Қуанышты күн қарсаңында өздеріңізбен емен-жарқын әңгімелесіп, мерекелік тілегімізді жеткізу үшін арнайы келіп отырмыз. Сіздерді мерекемен шын жүректен құттықтаймын. Сіздер облыстың, ауданның дамуына, гүлденуіне үлкен үлес қосып келесіздер, – деген аудан әкімі үлгілі отбасыларға құрмет көрсетіп, сый-сияпаттарын табыс етті.
Мұрат Нәлхожаұлы ат басын бұрған шаңырақтың бірі – Қазалы қаласындағы Мәшенбаевтар отбасы. Отағасы Қасымхан Мәшенбаев – ішкі істер саласының ардагері. Ал, жұбайы Зада Сермағамбетова – алты баланы өмірге әкелген ардақты ана. Қазалы қаласындағы тұтынушылар қоғамында сатушы болып еңбек еткен. Қазіргі таңда зейнет демалысында. Отау құрғандарына 55 жыл болған. Отбасында 6 бала, 19 немере, 3 шөбере тәрбиелеп отырған құрметті ата-әже. Балаларының барлығы Қазақстанның бірнеше қаласында қызмет жасауда.
Аудан әкімі мереке қарсаңында көпбалалы ана Әсем Хасанова мен Тұрсынкүл Байымбетованы да Отбасы күнімен құттықтады.
№266 мектеп-лицейде ағылшын тілінің мұғалімі болып жұмыс жасайтын Әсем Хасанова өмірге 7 ұл бала әкелген «Алтын алқалы» ана. Шаңырақтың отағасы Мейрамбек Талғатұлы – Әйтеке би кентіндегі «Дәулет-А» зауытында темір жонушы болып жұмыс жасайды.
Ал, Тұрсынкүл Байымбетова 6 бала тәрбиелеп, Қазақстан Республикасы Президентінің жарлығымен «Күміс алқа» наградасын алған. Теміржол әскери күзет мекемесінде жұмыс істейтін жұбайы Руслан Байымбетов тәжік-ауған соғысының ардагері.
«ҚАЗАЛЫ» ақпарат
