Өрт – тілсіз жау
Жаз – өрт қаупінің күшейетін кезі. Тілсіз жаудың адам мен орын таңдамайтыны белгілі. Ата-бабаларымыз «жеті жұттың» біріне санаған өрт апатын шындығында тілсіз жау деуге тұрарлық.Бүгін аудан орталығындағы «Орын-ай» базары аумағында орын алған ойда-жоқта тұтанған өрт оқиғасы баршамызға әбігер туғызды.
Қазіргі таңда Қазалы ауданының №9 өрт сөндіру бөлімінен 3 өрт сөндіру автокөлігі мен 24 жеке құрамы жұмылдырылып, өрт қаупін ауыздықтауға күш салынуда. Сонымен қатар басқа да мекемелердің жұмысшылары, техникалары да көмекке келді.
Өрт гидранттарында қысым көбейтіліп, өртті сөндіру жұмыстары жүргізіліп жатыр. Абырой болғанда қауіпті оқиғадан адам зардап шеккен жоқ. Аудан әкімдігі тарапынан комиссия құрылып, тиісті жұмыстар қолға алынуда.
Баршаңыздан сабыр сақтап, мұндай төтенше оқиғалардан абай болайық.
