Қола жүлде қанжығалады
Жуырда Нұр-Сұлтан қаласында таэквондодан 2004-2006 жылғылардан құралған жастар арасындағы Қазақстан Республикасының V жастар ойыны өтті. Онда елдің түкпір түкпірінен келген 18 спортшылардың арасынан Қазалы ауданының №17 олимпиадалық резервтің балалар-жасөспірімдер мектебінің таэквандошысы Әсел Қуандыққызы қола жүлдені қанжығасына байлады. Әсел 46 келі салмақ дәрежесі бойынша сынға түскен болатын.– Мектеп жастағы оқушыларды салауатты өмір сүруге тәрбиелеу қазіргі заманның басты мақсаты. Табиғатта жан мен тән үйлесім таппай денсаулықтың да болмайтыны әрбір жас ұғынуы, түйсінуі қажет деп есептеймін. Шығыс күрестеріне жататын ұрыстық спорттың бұл түріне Әселді 9 жасынан бастап жаттықтырдым. Оның ширақтығы мен шапшаңдығы тәнті етеді. Аптасына 6 рет жаттығу өткіземін, – дейді таэквондо бөлімшесінің жаттықтырушысы Дәулет Қадіров.
Оның айтуынша, спорттың осы түрімен айналысқандардың ішкі мәдениетін, мінез-құлқын, тәртібін, ерік-жігерін тәрбиелейді, жауапкершілік сезімін дамытады. Таэквондо сабағының үстінде оқушылар жылдамдықты, ойлау қабілетін, интуицияны, өзінің денесімен өз көңіл-күйін басқара білуге машықтанады. Тіпті физикалық нашар адамға өзіне сенімді болуға, өзін-өзі және өзгелерді қорғауға мүмкіндік береді.
Бүгінде Әсел Қуандыққызы Қазақстан чемпионатынан жүлдегер, спорт шеберіне кандидат, Ашық Азия ойындарының қатысушысы, Қызылорда облысының құрама командасының мүшелігінде тұр.
Айнұр ҚАЗМАҒАМБЕТОВА
