Спортшылардың табысы
Жуырда Алматы қаласында 2001-2003 жылы туылған жасөспірімдер арасында грек-рим күресінен Дәулет Тұрлыхановтың жүлдесіне арналған турнир өтті. Дүбірлі додаға еліміздің барлық өңірінен 30 команда қатысты.Байрақты бәсекеге біздің балуандарды Әйтеке би кентіндегі №17 олимпиадалық резервтің мамандандырылған балалар жасөспірімдер мектебінің директоры Қуанған Бәкен бастап барды. Онда жерлестеріміз командалық есеп бойынша 8 орынға жайғасты.
Сол сында 45 келі салмақ дәрежесінде бақ сынаған Диас Қалабай қола медальға қол жеткізді. Қазалылық жас балуанның республикалық турнирде жүлдегерлер қатарынан көрінуіне бапкері Мұхтар Рахметовтың еңбегі ерекше екенін айта кеткен орынды.
Ж.СОВЕТҰЛЫ
***
Сәуір айының басында Астана қаласында белбеу күресінен өткен ел чемпионатында жерлесіміз Серікбол Сембиев күміс медальді қанжығасына байлады. Қазақстан Республикасының чемпионатында 75 келі салмақта өнер көрсеткен Серікбол Сембіұлы Қазалы спорт клубында дзюдо жаттықтырушысы болып еңбек етеді.***
Қазалылық таеквондошы Тараз қаласында Қарасай Тұрысовты еске алуға арналған республикалық турнирде топ жарды.Таеквондоның WT жекпе жегінен жасөспірімдер мен жастар арасында өткен бәсекеде Қазалы спорт клубының спортшысы Назым Жақсылық жеңістің биік сатысынан көрініп, жеңімпаз атанды. Назым бүгінгі таңда Ж.Жабаев атындағы №234 мектепте оқиды.
Сондай-ақ, осы турнирде Ғ.Мұратбаев ауылындағы №91 орта мектебінің оқушысы Мадияр Әбілқасым мен №266 мектеп-лицейдің шәкірті Құтай Орымбет жүлдегерлер қатарынан көрініп, үшінші орынға ие болды.
Жүйріктерді жарысқа дайындап, дүбірлі додаға қосқан Қазалы спорт клубының таеквондо үйірмесінің жаттықтырушысы Серік Жиенбаев.
Тимур АЛИМОВ
