Азия чемпионатынан 6 медаль

Атырауда таеквондодан кадеттер мен жастар арасында өткен ашық Азия чемпионатында Қызылорда облысының құрамасы 6 жүлдені қоржынға салды. Дүбірлі бәсекеде №1 облыстық олимпиадалық резервтің мамандандырылған балалар-жасөспірімдер мектебі мен Ж.Баһадүр атындағы олимпиадалық резервтің мамандандырылған мектеп-интернат-колледжінің тәрбиеленушілері табысты өнер көрсетіп, 2 алтын, 2 күміс, 2 қола медальдарды иеленді.

Жастар арасында сынға түскен Жәния Әмірхан (44 келі) мен кадеттер арасында Досжан Жақсылық (53 келі) Азия чемпионатында алтын жүлделерге ие болды.

Жастар арасында Әділжан Данияр (48 келі) мен Сымбат Мұханбетқали (68 келі) күміс, кадеттер арасында Азамат Садық (41 келі) және жастар арасында Арман Сүйеубай (53 келі) қола жүлделерді еншіледі.

Спортшылардың жетістіктерге жетуіне ықпал жасаған облыстың аға жаттықтырушысы Нұрлыбек Сухан мен жаттықтырушы Рашид Сандықбаевтың еңбектерініңзор екендігін айтуға болады.

Спортшылар келесі жылы Шымкентте өтетін ҚР чемпионатына қатысады. Бұл жарыстан іріктелген таеквондошылар Әлем чемпионатында бақтарын сынайды.