Рахат Болгарияда бақ сынайды

Жақында Шығыс Қазақстан облысындағы Семей қаласында 1998-2000 жылы туылған жастар арасында Қазақстан Республикасының чемпионаты өтті. Оған еліміздің түкпір-түкпірінен келген спортшылармен қатар, Қазалы ауданының балуандары да бақ сынады.

Ел біріншілігінде 72 келі салмақта белдескен қазалылық Рахат Сағымбай бапкер үмітін ақтап, туған жерге жеңіспен оралды. №17 Қазалы аудандық олимпиадалық резервтің мамандандырылған балалар-жасөспірімдер мектебінің тәрбиеленушісі, білікті бапкер Ғанибек Нысан жаттықтыратын жерлесіміз ақтық сындағы қарсыласынан ғана ұтылып, күміс медальға қол жеткізді.

Өткен жылы Азия чемпионатында топ жарған Рахат бүгінгі күні Өзбекстан Республикасының астанасы Ташкент қаласында оқу-жаттығу жиынында жүр. Онда ол ел құрамасының балуандарымен бірге 4 сәуірге дейін жаттығады. Амандық болса, 9-13 сәуір күндері Болгарияда өтетін халықаралық жарысқа қатысады.

Сәуір айында халықаралық турнирге қатысатын балуанға сәттілік тілейміз.