Елорданың Білім басқармасы ауруханаға жатқызылған бес жасар қызды үйге жіберуге байланысты жұмыс істеп жатыр, деп хабарлайды Вaq.kz ақпарат агенттігі мекеменің баспасөз қызметіне сілтеме жасап.

Басқарма басшысы Әнуар Жанғозиннің айтуынша, Қазақстанда заң бойынша әрбір бала отбасында өмір сүруге және тәрбиеленуге құқылы. Сонымен қатар, ата-анасының қамқарлоғынсыз қалған балаларды үйге орналастырудың отбасылық формасына басымдық беріледі.

«Имираль Сәдуақасова ата-ананың қамқорлығынсыз қалғандықтан (анасы тергеу изоляторында, әкесі белгісіз), қазіргі кезде баланы үйге орналастыруға байланысты жұмыс жүріп жатыр. Анасы жағынан туыстары іздестірілуде», - деді ол.

Жанғозин білім басқармасы мәселені қадағалап отырғанын атап өтті.

«Қызға міндетті түрде әлеуметтік көмек және қолдау көрсетіледі», - деді ол.

Еске сала кетейік, ҚР Балалар құқығын қорғау уәкілетті органның Facebook желісіндегі парақшасында ауруханаға ауыр жарақатпен келіп түскен 5 жасар қыз туралы жазылды. №2 ауруханада баласымен бірге жатқан әйел 5 жасар қызға көмек сұрап, WhatsApp желісіне хат жіберген.