Педагог-логопедтер ерекше білім беру әдістерін талқылады

Қазақта «Баламның табанына кірген тікен менің маңдайыма кірсін» деген сөз бар. Ол әрбір ата-ана баласының басына қиындық түскенінен жаны қиналатынын сипаттайды. Алайда өмірдің өз дегені бар. Әсіресе айналасын танып-түсіне бермейтін, қоршаған ортаға бейімделмеген ерекше балалар жайлы айта кеткенде әркімнің де жанына батары сөзсіз. Оларды бағып-қағып, әлі жеткенше тәрбиелеп, оңалтып отырған ата-ананың жай-күйін түсіну одан да қиын. Осыған байланысты 29-шы қараша күні №21«Алпамыс» бөбекжай-балабақшасында «Мектепке дейінгі ұйымда ерекше білім беруді қажет ететін балалармен түзете-дамытудың әдістері» тақырыбында аудандық шығармашылық күні өтті.
Қазалы ауданы бойынша білім бөлімінің іс-шаралар жоспары аясында ұйымдастырылған ай сайын шығармашылық күндердің бірі «Ерекше балаларға» арналды.. Шараға мектепке дейінгі және орта білім беру ұйымдарындағы балабақша және шағын орталықтың логопед және дефектолог мамандары қатысты.
Ерекше білім беруді қажет ететін тәрбиеленушілерге түрлі әдіс-тәсілдер арқылы түзете дамыту жұмыстарын жүргізіп, ата-аналарға, тәрбиешілерге сол бағыттағы жұмысты бірлесе орындау мен арнайы мамандарға әдістемелік көмекті ұйымдастыруды көздеген жиында әдістемелік кабинеттің әдіскері Н.Аманкелдіқызы шығармашылық күннің бағдарламасымен таныстырып және өзінің іс-тәжірибесімен бөліскелі отырған логопед маман А.Нұрдаулетке сәттілік тіледі.
Сонымен қатар қатысушы арнайы педагог-логопедтерге балабақшаның педагог-психологі М.Мейрамбек «Біз біргеміз», «Ойын және менің көңіл-күйім» және «Негативтер тақтасы» сынды тақырыптарда тренинг жүргізіп, қатысушы мамандарға жаңа оқыту тәсілдерін көрсетті.