Үздік тәлімгерлер тартысы

«Жас ұланның жұлдызды жылы» жобасы аясында жалпы білім беру ұйымдарындағы жас тәлімгерлердің біліктілігі мен кәсіби шеберлігін шыңдау мақсатында «Үздік жас тәлімгер – 2022» аудандық байқауы өтті. Сайыс шарты бойынша қатысушылар «Жас ұланда жаңа жоба» бөлімі бойынша жаңа креативті жобаларын ұсынса, «Ізденген жетер мұратқа» додасында еріктілермен жасаған жұмыстарын ортаға салды. 

Сонымен бірге, оқушыға пайдалы “лайфхак” көрсетіп, шығармашылық қабілеттерін сынға салды.

Байқау қорытындысына сай, №91 мектептің тәлімгері Елнұр Нұрқасым «Үздік жас тәлімгер – 2022» сайысының жеңімпазы атанды. Екінші орынды №276 мектептің қызметкері Кеңшілік Өтегенов иеленсе, №92, №103 мектептің мамандары Бағдагүл Іскендірова мен Ақмарал Келманова үшінші орынды өзара бөлісті.

Бұдан бөлек, Кеңшілік Өтегенов «Жаңашыл тәлімгер», Күмісай Нағашыбай «Ең үздік визитка», Елнұр Нұрқасым «Ең үздік портфолио» және Бағдагүл Іскендірова «Ең үздік бейнеролик» номинациясымен марапатталды.