Қазалы Қазалы аудандық қоғамдық-саяси газет
» » Шәкірттерін шеберлікке баулыған

Шәкірттерін шеберлікке баулыған

Бүгінде адамзаттың қиялы мен тапқырлығына шек жоқ. Жыл өткен сайын білімді жандардың жан-жақты ізденімпаздығының арқасында ғылым мен технология қарқынды дамуда. Соның ішінде тұрмысқа қажетті заттардың бір түрден екінші кейіпке енуі тұтынушылардың қызығушылығын арттыруда. Оларды трансформер жиһаз деп атайды. Яғни, шағын бөлменің кеңістігін тарылтпайтын жинақы бір дүниеден бірнеше пайдалы бұйым шығады екен. Мысалға: шкафтан диванға немесе төсекке айналады. Диваннан екі қабатты (ярусты) төсек болады.
Сондай-ақ, манежден үстел, төсек, кресло, диванға айналатын бөбекке арналған жиһаздар да кездеседі. Осы сынды дүниелерді дайындау қазалылықтар үшін таңсық емес. Оны Қазалы аграрлы-техникалық колледжінің мұғалімі Жұмағали Бегалиев өз шеберлігімен дәлелдеді.
Жұмекең Қазалы қаласының тумасы. Целиноград инженерлік құрылыс институтын «Ауылшаруашылық құрылысы» мамандығы бойынша тәмамдаған. Еңбек жолын құрылысшы болып бастаған ол, қазір Қазалы аграрлы-техникалық колледжінде арнайы пән оқытушысы қызметін атқарады. Өткен оқу жылынан бері өндірістік оқыту шебері болып жұмыс істейді.
Ж.Жұмаханұлы ІІІ курстағы №15-4 «Ғимараттар мен құрылымдарды салу және пайдалану» тобының өндірістік оқыту шебері. Күнделікті сабақ барысында болашақ ұсталарға түрлі ағаш бұйымдарын, оның ішінде тұрмыста қолданылатын нан тақтай, оқтау, турағыш тақтай, шәй үстелі, орындық жасауды үйретіп келеді.
Жақында облысымызда «Кәсіптік білім және бизнес: әріптестер сұхбаты» VIІІ облыстық еңбек форумы аясында техникалық және кәсіптік білім беру оқу орындарының арасында өткізілген бағдарлы байқау-көрмесінде колледж ұжымы екінші орынды иеленді. Қорытындысында облыстық білім басқармасының екінші дәрежелі дипломымен марапатталды. Байқауда қолөнер бұйымы – жиналмалы үстел-орындық өңірдегі техникалық және кәсіптік білім беру саласы мамандарының қызығушылығын арттырған болатын.
Ол оқу орындарының кәсіби білім беру бағытындағы ерекшелігін айқындайтын «Кәсіптік білім және бизнес: әріптестер сұхбаты» VIІІ облыстық еңбек форумы қарсаңында шәкірттеріне жиналмалы үстел-орындық әзірлеу идея¬¬сын ұсынып, аталған бұйымды жасады.
«Әр топқа бір шығармашылық жұмыс әзірлеу тапсырылған күннен бас¬тап ой үстінде жүрген едім. Үйде қызым әлеуметтік желілерден көрген осы жиналмалы үстел-орындықтың суретін көрсетті. Сол мезетте осы дүниені жасап көрсем деп шештім. Сызбаға қарап отырып, тобымның студенттерімен бірігіп жасап шықтық. Ұнағаны соншалықты, студенттер тағы біреуін жасап көргісі келді. Сөйтіп екі дана бұйымды дайындап шығардық. Облыстағы техникалық және кәсіптік білім беретін оқу орындары арасында аталған еңбегімнің жоғары бағаланғанына қатты қуандым. Қазір оны көрген тұрғындардан сиқырлы үстелді жасап беруге ұсыныстар түсіп жатыр. Бар білгенімді болашақ мамандарға үйретсем деймін. Алда әлі де талай жұмыстар жоспарлап отырмын», – дейді Жұмағали Жұмаханұлы. Бүгінде керемет жиналмалы үстел-орындық жұрттың назарын өзіне аударып, бұған халықтан сұраныс көптеп түсуде.
Болашақ ұрпақтың білімді, қоғамға қажетті маман болып өз ісіне жауапкершілікпен қарауы бүгіннен басталады. Ел Президенті Н.Ә.Назарбаевтың «Болашаққа бағдар: рухани жаңғыру» мақаласындағы «Табысты болудың ең іргелі, басты факторы білім екенін әркім терең түсінуі керек. Жастарымыз басымдық беретін межелердің қатарында білім әрдайым бірінші орында тұруы шарт. Себебі, құндылықтар жүйесінде білімді бәрінен биік қоятын ұлт қана табысқа жетеді» – деген еді. Айтылған міндетті басшылыққа алған колледж ұстаздары шәкірттерді оқытумен қатар, белгілі бір мамандыққа баулуда бар білімін сарп етуде. Адам қабілетінің дәрежесі мен кәсіби іскерлігі үйлесім тапса, бизнес¬пен айналыса алатын, заманына сай мамандар шығатыны анық.

Айнұр ҚАЗМАҒАМБЕТОВА.
11 желтоқсан 2017 ж. 180 0

Жаңалықтар мұрағаты

«    Шілде 2018    »
ДсСсСрБсЖмСбЖс
 1
2345678
9101112131415
16171819202122
23242526272829
3031