117-пәтер: түрлі тағдырлар тоғысы
Өткен жұмада Роза Бағланова атындағы аудандық мәдениет орталығында өнер сүйер қауым ерекше әсерге бөленді. Жәдігер Тұрсынов атындағы халықтық театр көрермен назарына драматург Қасым Аманжолдың «117-пәтер» атты туындысын ұсынып, аудан мәдени өміріне тың серпін берді. Комедиялық-драма жанрында жазылған қойылым адам тағдырларының алуан қырын бір ғана шағын пәтердің ішінде жинақтап, көрерменді терең ойға жетеледі.Спектакль 30 шаршы метрлік бір бөлмелі қарапайым пәтердің ішінде болған жайды суреттейді. Дәл осы тар кеңістікте түрлі дәуір өзгерістері мен сана-сезімдегі құбылыстар, адамдардың үміті мен өкініші, қуанышы мен мұңы қатар өрбиді. Қойылымның басты кейіпкері – пәтердің домовойы Исмайл Омаров. Ол жылдар бойы бұл үйдің табалдырығын аттаған әр адамның тағдырын көзбен көріп, жүрекпен сезініп, күнделікке түртіп отырған жан. Жаңа тұрғындармен бірге көрермен де сол өткен өмір парақтарын бірінен соң бірін ашып, әр кейіпкердің жан сырын тыңдайды.
Спектакльдің әр эпизоды – жеке бір әлем. Өмірге ғашық музыканттың арманы, қоғамның ауыр жүгін арқалаған мұғалімнің күресі, күнделікті тіршіліктің күйбеңінен шаршаған жұмысшының тағдыры, жастық шақтың албырт сезімдері, отбасылық түсініспеушіліктер, жалғыздыққа қарсы тұру, үміттің өшпеуі сынды түрлі оқиғалар шебер өріледі.
Қойылымды сахнаға алып шыққан қоюшы режиссёр И.Рсалиева мен суретші Ә.Өтелбаевтың жұмысы көрермен тарапынан жоғары бағаланды. Әсіресе шағын сахналық кеңістікті түрлі эмоциялық деңгейде аша білуі мен эпизодтардың бір-бірімен жымдаса байланысуы шығарманың әсерін күрт арттырды.
Кешке арнайы келген аудан әкімі Алмасбек Есмаханов та көрермендермен бірге қойылымды бастан-аяқ тамашалап, өнерпаздардың еңбегіне оң бағасын берді.
«117-пәтер – бүгінгі қоғамдағы әлеуметтік контрасттарды, отбасы ішіндегі қарым-қатынасты, адамгершілік пен немқұрайлылықтың арасындағы шекараны шынайы көрсететін туынды. Жалдамалы пәтерлерді жағалап жүретін қаншама адамның өмір сүру дағдысы, әр шаңырақта орын алатын ішкі драмалар, адамдардың тіршілікке деген түрлі көзқарасы сахнада табиғи қалпында, көркемдікпен бейнеленді. Қойылым көрерменді бірде күлдіріп, бірде толғандырып, кей тұста жүректі шымырлатқан сәттерімен есте қалды. Қазыбек Аманжолдың бұл еңбегі – қоғамдағы құбылыстарға сын көзбен қарауға, адамның ішкі жан дүниесіне үңілуге шақыратын маңызды шығарма. Драма мен юмордың қатар өрілуі, қайғы мен үміттің үндестігі, тұрмыстық өмірдің күйбеңі мен адамдық қасиеттің салмағы көрермен жүрегіне жол тапты» дейді қойылымды тамашалаған жұртшылық.
Қойылым соңында актерлер зал толы қошеметке бөленіп, көрермен ықыласы олардың еңбегіне берілген шынайы бағаға айналды. Аудан сахнасында ұсынылған «117-пәтер» – жай ғана қойылым емес, өмірдің өзінен алынған айна. Ол әр көрерменге ой салды, әр жүрекке әсер етті. Осындай рухани шаралар аудан мәдениетінің дамуына серпін берері анық.
Арайлым ЖҮСІПОВА
