Қазақстанда ең апатты жол учаскелері анықталды
Бұл учаскелерде жылдамдық төмендетіліп, жаңа жол белгілері қойылған
Фото: istockphoto.com
Фото: istockphoto.com
Қазақстанда апат қаупі жоғары елуден астам жол учаскесі анықталды. Бұл туралы көлік вице-министрі Мақсат Қалиақпаров мәлімдеді, деп хабарлайды Azattyq Rýhy.
«Ең апатты учаскелер анықталды. Қазір бұл жолдарда жылдамдықты төмендету, қажетті белгілерді орнату бойынша жүйелі жұмыс жүргізіліп жатыр. Бұл шаралар жалғасады», – деді Қалиақпаров Үкіметтегі баспасөз мәслихатында.
Вице-министрдің айтуынша, жақында Ақтөбе облысындағы бір қауіпті жол бөлігі жөнделген, осыдан кейін ол жерде бірде-бір жол апаты тіркелмеген.
«Ақтөбе облысында бірнеше апатты қауіпті учаске бар. Соның бірінде жуырда тиісті шаралар қабылданды және расымен өзгерістер енгізілгеннен кейін бірде-бір жол апаты болған жоқ. Қазақстан бойынша мұндай учаскелер елуге жуық. Барлық өңірде жұмыстар жүріп жатыр, жол белгілері орнатып, ерекше бақылау күшейтілуде. Мұны ІІМ мен ТЖМ қызметтерімен бірлесіп істеп жатырмыз», – деді Қалиақпаров.
Айтуынша, биыл жаңғырту жұмыстары 13 мың шақырымды қамтыған.
Ақылы жолдар
Сондай-ақ Қалиақпаров ақылы жүйе тек техникалық талаптарға сай келетін және тегін баламасы бар жол учаскелерінде ғана енгізілетінін атап өтті.
«Ақылы режимге ауысатын учаскелер тізімі бөлек жарияланады», - деді ол.
Негізгі бағыттардың ішінде Қарағанды – Алматы, Талдықорған – Өскемен трассалары және Астрахань бағыты бар.
