Сурет салу – сүйікті ісі

«Ел іші – өнер кеніші» демекші, ауыл-аймағымызда түрлі өнерді жанына серік еткен жандар жетерлік. Бірі нақышына келтіре ән шырқаса, екіншісі құлағыңның құрышын қандыратын күйші. Ал, бүгінгі кейіпкеріміз Расул Ақмырзаев болса, қылқаламмен ішкі жан дүниесін ақ параққа түсірген суретші. 2000 жылы Ақсуат ауылында дүние келген ол ауылдағы №100 орта мектептің 11 сынып оқушысы. Бала кезінен сурет өнеріне ынтығы ауған ол әдепкіде пейзажға әуестенсе, кейіннен портрет, графика сияқты бағыттарға да ден қойған.

Дана халқымызда «Ат тұяғын тай басар» деген мәтел бар. Десе дегендей, Расулдың бойындағы өнер де әкеден балаға қанмен берілген деуге болады. Отбасындағы жақын-жуығының барлығы қылқаламды жанына серік еткен. Атасы Ақмырза Момытаев қолөнермен айналысып, саз балшықтан мүсіндер жасаған. Әкесі Асылбек Ақмырзаұлы құлпытасқа сурет салады. Әрі ұсынақты ұста. Асылбек ағаның осы кәсіпті нәсіп еткеніне 20 жылға жуықтапты. Бәлкім, «Тектіден тексіз тумайды» деген осы шығар.

Бағыт-бағдар беріп, жөндейтін тұстарын айтып отыратын ақылшысы – әкесі. Расул қазақтың Әбілхан Қастеев, Ағымсалы Дүзелханов, шетелдің Леонардо да Винчи, Сальвадор Дали сияқты ұлы суретшілерінің туындыларын ұнатады, ал ерекше сүйсінетіні – Голландияның атақты суретшісі Рембрандттың шығармалары.

– Бойында талант болмаса, суретші болу қиын сияқты. Суреткердің жан дүниесі салған туындысынан көрінеді. Тіпті, кейде шабытсыз-ақ ақ қағазға ғажап дүниелер түсіруге болады. Шынымен-ақ бұл ыждаһаттылық пен төзімділікті талап ететін қиын өнер. Оған кететін уақыт суреттің күрделілігі мен оңайлы­ғына да байланысты, – дейді талантты жас.

Ол ұстазы Қайрат Есіркеевпен талай жарыстарда топ жарып, жеңіске жеткен. 2015 жылы аудандық жас суретшілер байқауында үшінші орын, 2016 жылы аудандық қолөнер шеберлері мен суретшілер байқауында «Өнерлі елдің – өрісі кең» дипломымен, облыс көлемінде Жалаңтөс баһадүрдың 440 жылдығы, Бегім ана, Асандар көтерілісі құрбандарына арналып өткізілген суретшілер байқауында бірінші орын, аудан көлемінде ұйымдастырылған «Ұлт­тық өнер – өшпес қазына» қолөнер қыл­қалам шебер­лері байқауында бірінші орын. Аудан, облыс көлемінде ЭКСПО – 2017 көрмесі аясында ұйымдастырылған «Қол­өнер – халық қазынасы» атты қылқалам шебер­лері байқауында арнаулы дипломмен марапатталған.

Ескерте кетейік, біз сөз қылып етіп отбасы мүшелері әуесқой суретшілер. Осындай дарыны мен икемі бола тұра олардың кәсіби суретшілік жолды таңдамағанына таңқаламыз. Расулдың да таңдауы басқа салаға түсіп тұр, яғни дәрігер болғысы келеді. Жүрек қалауына ешкім шек қоя алмайды. Бірақ сурет салу оның сүйіп істер әрі бос уақытты тиімді өткізер хоббиі болып қала бермек. Сондықтан алдағы уақытта қандай бағытта жұмыс істесе де, қазақтың маңдайалды ұлдарының бірі болуына тілектеспіз.