Сәрсенбіде Әйтеке би кенттік клубында «Салт-дәстүр мен діни рәсімдер сабақтастығы» тақырыбында аудандық діни-танымдық семинар өтті. Оған аудан әкімінің орынбасары Әлімжан Жарылқағанов қатысып, дін мен дәстүрдің сабақтастығы туралы кеңінен талқылады. Ол қасиетті Рамазан айымен құттықтап, қазақ халқының салт-дәстүрі ислам дінімен ұштасып, шариғат үкімдерімен сабақтасып жатқандығын тілге тиек етті. Жиылғандарға ысырапшылдықты болдырмай алдын алу жолдарын қарастыру қажеттігін айтты.

Күн тәртібіне сәйкес аудандық ардагерлер кеңесінің төрағасы Оразғали Бекбанов, ардагер-ұстаз Шарапат Алтынбаев, «Жанқожа батыр» мешітінің бас имамы Берік Сүлейменов, «Қожаназар ишан» мешітінің имамы Кенжебай Берінбаев ұлттық құндылықтардың исламмен үндестігі жайлы баяндады. Сондай-ақ, тарих пен салт-дәстүрдің дінмен сабақтастығына тоқталып, салиқалы ойларымен бөлісті.

Сондай-ақ, аудан тұрғындары: Ә.Жанаев, Т.Ерғараев, С.Берденұлы, Ө.Күлімбетов әр ру басының ақсақалдарын жиып, қаралы үйдегі ысырапшылдықты шектеп, шапан тарату үрдісін тыю ұсыныстарын ортаға салды.