Бала еңбегін қанамау – ортақ міндет
Бүгін елімізде "Бала еңбегін пайдалануға қарсы 12 күн" Ұлттық ақпараттық науқаны басталды. Бұл – бала еңбегін заңсыз пайдалануға, балалардың құқығы мен еркіндігін шектеуге қарсы күресетін маңызды кезең.
Балалар — қоғамның ең әлсіз әрі қамқорлықты қажет ететін бөлігі. Өкінішке орай, кей жағдайларда олардың еңбегі заңсыз, тіпті қауіпті ортада пайдаланылып жатады. Мұндай мәселелерді елемеу — болашақты елеусіз қалдырумен тең. Әрқайсымыз баланың құқығы бұзылған кез келген жағдайға бей-жай қарамай, дер кезінде араласуымыз қажет. Балалар білім алуға, ойнауға, демалуға және қауіпсіз ортада өсуге тиіс. Баланың еңбегін қанау — олардың дамуына, психикалық және физикалық саулығына қауіп төндіреді. Ескерусіз қалған әрбір бала — қоғамдағы ортақ олқылық.
Осы 12 күнде арнайы кездесулер, түсіндіру шаралары, тренингтер мен ақпараттық жұмыстар өтеді. Қоғам болып бірігіп, бала еңбегін қанамауға үн қосайық!
