Мәжілісте тазалық мәселесі қаралды

Осыған орай аудан әкімінің орынбасары Мұрат Әбсұлтановтың төрағалығымен арнайы мәжіліс өтіп, аудан көлемінде жасалатын санитарлық тазалық, көркейту-көгалдандыру және абаттандыру жұмыстары талқыланды.

-Туған жердің тазалығы әр қашанда басты назарда болуы тиіс. Сол үшін де біз жан-жағымызды жинастырып, санитарлық тазалыққа мән беріп, көркейту-көгалдандыру жұмыстарын жүйелі түрде жүргізуіміз қажет. Жыл көлемінде аудан аумағында тазалық жұмыстарын ұйымдастыру үшін арнайы іс-шаралар жоспары әзірленіп, акция жоғары деңгейде жүргізілуі қажет, - деді Мұрат Байғабылұлы.

Соған сәйкес Әйтеке би кенті мен Қазалы қаласы және барлық ауылдық округ әкімдеріне наурыз мерекелеріне дейін санитарлық тазалық жұмыстарымен шектелмей, абаттандыру жұмыстарын жүргізіп, яғни елді мекендердегі мекемелер мен үйлердің қасбеттеріне сырлау, әктеу жұмыстарын жүргізуді тапсырды. Бұған қоса, аялдамалар, жол белгілері мен түнгі жарықшамдарын сырлау, автомобиль жолдарына жол жолақтарын сызу сынды жұмыстарды да жүргізу қажеттігін айтты.

Сонымен қатар «Таза Қазақстан» экологиялық акциясы аудан көлемінде жыл көлемінде жалғасатынын айтып, туған жердің тазалығы үшін тұрғындарды да тазалық акциясына белсене қатысуға ұйымдастыру керектігін жеткізді.