Есімі ұрпақтар жүрегінде
Құрметті жерлестер!Алаш жұртының арын арлап, туын көкке көтерген ұлт-азаттық көтерілісінің қаһарманы Жанқожа Нұрмұхаммедұлының ел тарихындағы рөлі ерекше.
Жанқожа баба өзінің асқан батырлығымен, халқына деген сүйіспеншілігімен, адалдығымен, адамгершілік қасиетімен ел аузында аңызға айналып, есімі ұрпақтар жүрегінде мәңгі сақталып қалған тұлға.
Міне, бүгінгі ұрпақ киелі өңірде әділдіктің туын жоғары ұстаған қаһарман, елі үшін туған ер есімін ұлықтау мақсатында жоғары деңгейде дүбірлі той өткізуде.
Мұндай игілікті шаралар батыр бабамыздың биік рухына тағзым ету және тағдырдың сан алуан қиындықтарынан сүрінбей өткен ата тарихынан тағылым алу үшін қажет.
Сондықтан қазыналы Қазалы тұрғындарын халқымыздың бостандығы мен тәуелсіздігі жолында көз жұмғанша күрескен халық батырының 250 жылдық мерейтойымен шын жүректен құттықтаймын!
Халқымызды қасиетті қазақ жерінің киесі демеп, баба аруағы жебеп жүрсін! Батыр бабамыздың мерейтойы баршаңызға құтты болсын!
Қырымбек КӨШЕРБАЕВ,
мемлекет және қоғам қайраткері
