Үкімет ереже бұзған көлік жүргізушілеріне барынша жеңілдік жасамақ

Үкімет ереже бұзған көлік жүргізушілеріне барынша жеңілдік жасамақ. Сенат бірқатар өзгеріс енгізіп, төменгі палатаға қайта жіберген Әкімшілік құқық бұзу туралы кодексті мәжіліс те мақұлдаған деп хабарлайды КТК арнасына сілтеме жасаған NUR.KZ.

Мәселен, енді ереже бұзған көлік жүргізушісі айыппұлды он күннің ішінде төлесе, айтарлықтай жеңілдік алады. Ал мүмкіндігі шектеулі жандарға арналаған тұраққа темір тұлпарын қойған азаматқа енді 22 мың теңгеден астам айыппұл салынады.

Бұрын мұндай жағдайда жүргізушілер мемлекетке 113 мың теңге төлейтін.

Ал қарсы жолаққа шығып кеткен көлік иесі 6 айға жүргізуші куәлігінен айырылады. Бұрын жаза бір жыл болатын.

Күндіз көлігінің шамын жақпағандарға ескерту жасалады немесе 7 мың теңге көлемінде айыппұл төлейді. Қазіргі құжат бойынша, айыппұл 13 мың теңге.

Сонымен қатар темір тұлпарын тыйым салған жерге қойғандарға да айыппұл екі есеге азайған.

Полицейлерге бағынбай, қарсылық танытқандар мемлекетке 68 мың теңге төлейді. Бірақ, бұл қылығын екінші рет қайталаса жарты жыл көлік жүргізуге тыйым салынбақ.

Ал ұсақ-түйек ереже бұзғандарға көбіне ескерту болады.

kaz.nur.kz